Арсенал направи џиновски чекор кон првата титула по две децении, откако со големи маки и многу среќа славеше на гостувањето кај Вест Хем со 0:1. Иако „топчиите“ не беа на своето препознатливо ниво, шпанскиот голман Давид Раја приреди вистинско шоу на голот, запишувајќи две нестварни интервенции кои ги оставија домаќините во очај. Казната за промашувањата на „чекичарите“ стигна во 83-та минута преку Леандро Тросар, кој прецизно ја круниса асистенцијата на Одегард за делириум во Северниот Лондон. Натпреварот заврши со контроверзна одлука и поништен гол на Калум Вилсон во судиското продолжение поради прекршок врз Раја, со што Арсенал побегна на пет бодови предност пред Сити, додека Вест Хем остана заглавен во зоната за испаѓање.
Во останатите денешни натпревари од Премиер лигата, Бернли и Астон Вила ги поделија бодовите со 2:2, со истиот резултат заврши и дуелот меѓу Кристал Палас и Евертон, додека Нотингем Форест и Њукасл ремизираа со 1:1.
