Плановите на НБА лигата и ФИБА за формирање на револуционерното континентално натпреварување „НБА Европа“ влегуваат во петта брзина, а новата елитна лига со 16 екипи е проектирана да стартува веќе од сезоната 2026/27. Генералниот директор на НБА за Европа и Блискиот Исток, Џорџ Ајвазоглу, потврди дека овој амбициозен проект предизвикал невиден интерес кај моќните глобални инвеститори.

За разлика од досегашните европски системи, новиот модел целосно ги става клубовите во центарот на профитот, предвидено е тимовите да задржат дури 90 проценти од целокупната економија на лигата во првата деценија, со огромни гарантирани парични исплати уште од самиот старт. Лигата ќе функционира како спој на американскиот франшизен систем и традиционалниот европски спортски дух, со 12 постојани учесници и четири места кои ќе се обезбедуваат преку резултатски квалификации.

Американците веќе почнаа да ги влечат првите конкретни потези на теренот, па во Истанбул биле завршени исклучително конструктивни преговори со Галатасарај, а Ајвазоглу јавно ја посочи Турција и вечниот кошаркарски бренд Фенербахче како есенцијални фактори за претстојната кошаркарска трансформација. Крајниот рок за доставување на обврзувачките понуди од инвеститорите истекува на крајот на јуни, додека градовите кои ќе ги добијат престижните франшизи ќе бидат официјално промовирани наесен.

Иако претставниците на НБА и ФИБА месецов имаа средба со раководството на Евролигата со цел да се постигне апсолутен консензус, пораката од САД е повеќе од јасна. Нова средба е закажана за следниот месец, но доколку Евролигата набрзо не ги прифати условите, НБА е целосно подготвена самостојно да тргне напред со своите партнери и комплетно да го преземе европскиот кошаркарски поредок.