Шпанската фудбалска репрезентација се соочува со сериозен хендикеп пред претстојните натпревари во Лигата на нации, откако првата ѕвезда на Барселона, Ламин Јамал, нема да се приклучи на националниот тим. Според пишувањата на радио „COPE“, младиот офанзивец почувствувал болки во десното колено по вчерашното првенствено дерби против Атлетико Мадрид. По деталните медицински прегледи, донесена е одлука Јамал да остане во клубот за да го продолжи процесот на рехабилитација и да го санира проблемот.

Главоболките за селекторот дополнително ги зголеми и отсуството на напаѓачот на Реал Сосиедад, Микел Ојарсабал, кој не замина на собирот поради лекување од грип. Поради овие здравствени проблеми, речиси е извесно дека и двајцата фудбалери ќе го пропуштат четврточниот дуел на „Фуријата“ против селекцијата на Чешка. Сепак, медицинскиот штаб не ја исклучува можноста нивната состојба да се подобри во текот на наредните денови. Доколку закрепнувањето тече според планот, се очекува Јамал и Ојарсабал да му се стават на располагање на националниот тим за големото дерби против Англија кое се игра на 15 ноември.