Шпанскиот гигант Реал Мадрид е цврсто решен да донесе тренер од светска класа кој ќе го врати клубот на врвот, а како што пренесува „El Chiringuito TV“, прва желба на раководството е Јирген Клоп. Иако германскиот стратег неодамна се пошегува на сметка на шпекулациите кои го поврзуваат со „Сантијаго Бернабеу“, челниците на „кралевите“ се оптимисти дека можат да го убедат да ја напушти функцијата директор на фудбалски операции во „Red Bull“. Во него Мадрид гледа идеален наследник на Алваро Арбелоа и човек кој поседува авторитет и визија за целосно преродување на првиот тим по разочарувачката сезона.
Сепак, Клоп не е единственото звучно име во игра, бидејќи Жозе Мурињо останува една од најсериозните опции за враќање на жешкото столче. Португалецот ужива огромна поддршка директно од претседателот Флорентино Перез, кој верува во неговата способност за брзи резултати и дисциплина во соблекувалната. Клубот во моментов се наоѓа на важна раскрсница и бара стратег кој може веднаш да се носи со притисокот на најтрофејниот европски клуб. Претстојниот период ќе биде клучен за „белите“, додека навивачите со нетрпение очекуваат дали Реал ќе тргне по патот на германската филозофија или по добро познатиот „специјален“ рецепт на Мурињо. Се чини дека Перез нема да штеди ресурси за да осигура тренер кој повторно ќе го направи Реал страв и трепет на меѓународната сцена.
