Македонската ракометна репрезентација го дозна распоредот за настапот на Светското првенство 2027, откако Меѓународната ракометна федерација (ИХФ) ги објави термините за натпреварите од групната фаза.

Избраниците на селекторот Кирил Лазаров, ќе играат во групата Х во Магдебург, каде за противници ќе ги имаат селекциите на Јапонија, Бахреин и Исланд. Натпреварите ќе се одиграат во „ГЕТЕК Арена“.

Македонија турнирот ќе го отвори на 15 јануари против Јапонија од 18:00 часот, а два дена подоцна во истиот термин ќе се соочи со Бахреин. Најголемиот предизвик во групата ќе следува на 19 јануари, кога нашата селекција ќе игра против Исланд со почеток од 20:30 часот.

Трите најдобропласирани репрезентации од групата ќе обезбедат место во главната рунда, додека последнопласираниот тим ќе го заврши настапот по првата фаза од шампионатот.

Распоред на натпреварите на Македонија:

• 15 јануари: Македонија – Јапонија (18:00)
• 17 јануари: Македонија – Бахреин (18:00)
• 19 јануари: Исланд – Македонија (20:30)