Предстојниот дуел меѓу Босна и Херцеговина и Шведска во УЕФА Лигата на нации ќе донесе емотивен крај на една величествена ера во балканскиот фудбал. По речиси две децении верност кон националниот дрес, капитенот и легендарен напаѓач Един Џеко дефинитивно оди во репрезентативна пензија.

Сепак, последната вечер во сино-жолтиот дрес може да добие уште повисок историски сјај. Доколку се запише во листата на стрелци против Швеѓаните, Џеко ќе го собори рекордот на Кристијано Роналдо и ќе стане најстариот стрелец во целата историја на УЕФА Лигата на нации.

Португалскиот ас го постави актуелниот рекорд кога на 8 јуни 2025 година ја затресе мрежата на Шпанија на возраст од 40 години и 123 дена. На денот на соочувањето со Шведска, популарниот „Дијамант“ ќе има точно 40 години и 199 дена, односно ќе биде 76 дена постар од Роналдо, што му отвора совршена можност на спектакуларен начин да стави краен печат врз својата репрезентативна кариера.

За време на 19-годишното патување со националниот тим, Џеко изгради статус на апсолутен идол, соборувајќи ги сите можни рекорди. Со 151 одигран натпревар и 73 постигнати голови, тој заминува како убедливо најдобриот стрелец и фудбалерот со најмногу настапи во историјата на својата земја.