Солзи, болка и целосно неверување. Кристијано Роналдо го заврши својот шести Мундијал пред самата завршница. Португалскиот ас по сè изгледа ќе ја заокружи кариерата без единствениот трофеј кој му недостасува во богатата ризница. Титулата светски првак е она што ја одвојува бесмртноста од просечноста во фудбалот.

Искусниот напаѓач на овој шампионат постигна три гола. Со тоа испиша нова историја како единствен играч кој се запишал во стрелците на шест различни Светски првенства. Сепак, неговиот главен сонов остана недостижен. И покрај головите, Роналдо разочара со вкупната игра бидејќи не креираше ниту една вистинска шанса за соиграчите. На овој натпревар многу повеќе потфрлија останатите португалски ѕвезди, кои во ниту еден момент не делуваа како компактен тим на теренот.

Кога Шпанците ги кренаа рацете за победа, Роналдо не можеше да ги сокрие емоциите. Во тие тешки моменти не успеаја да го утешат ниту соиграчите, ниту противниците. Младиот Ламин Јамал спортски му пријде и искрено го прегрна искусниот колега. Со овој пораз се затвора една епска епоха на Светските првенства која траеше уште од 2006 година. Роналдо зад себе остава мундијалска статистика од 27 одиграни натпревари и 11 постигнати голови.

Сè уште останува отворено прашањето дали тој веднаш ќе се повлече од националниот тим. Во микс-зоната по натпреварот, легендарниот капитен само кратко и со разочарување го прокоментира исходот од големото дерби.

Португалскиот капитен не сакаше да открива ништо повеќе околу својата иднина. Очигледно е дека ваквата голема одлука не треба да се носи со жешка глава, туку ќе мора прво добро да преспие.