Мохамед Салах се огласи по болната елиминација на Трабзонспор од Лига Европа и испрати јасна порака дека неуспехот нема да го промени неговиот став кон турскиот клуб. Египетската ѕвезда преку социјалните мрежи им се обрати на навивачите и призна дека разочарувањата се неизбежен дел од фудбалот, но токму тие треба да бидат дополнителна мотивација за нови успеси.

„Ништо во мојата кариера не дојде лесно. Лошите ноќи и разочарувањата се дел од фудбалот, а научив да ги претворам во мотивација и трофеи“, порача Салах.

Трабзонспор доживеа тежок удар во плејофот за пласман во Лига Европа, откако загуби со вкупни 0:5. По минималниот пораз на домашен терен, турскиот тим доживеа нов убедлив пораз во реваншот во Унгарија. И покрај неуспехот, Салах истакна дека неговата посветеност кон клубот останува непроменета.

„Трабзонспор е мојот клуб и јас сум дел од овој проект со целото свое срце. Резултатот од синоќешниот натпревар нема да го промени тоа“, порача искусниот напаѓач.

Салах истовремено призна дека очекувањата во клубот се големи, но верува дека тимот има квалитет да ги исполни.

„Знам дека очекувањата се високи и искрено верувам дека можеме и ќе постигнеме успеси. Дојдов тука за да победувам – тоа за мене не е само слоган“, додаде тој.

По елиминацијата од Лига Европа, тренерот Фатих Текке поднесе оставка, оценувајќи го настапот на својот тим како неприфатлив. Сепак, раководството на Трабзонспор не ја прифати неговата оставка. Турскиот клуб ќе продолжи со настапите на европската сцена во Лигата на конференции. Таму го очекуваат дуели со Фрајбург, Црвена звезда, КуПС Куопио, Хартс и Јаблонец, како и со ЦСКА од Бугарија.