Поранешниот српски фудбалер Жарко Грабовац е осуден во Белгија на пет години затвор поради вмешаност во одгледување канабис. Судот, покрај затворската казна, наредил и конфискација на 500.000 евра, а казната е условна, според извештаите на белгиските медиуми.

Случајот бил откриен во ноември 2023 година, кога истражителите пронашле две плантажи со канабис во белгиските населени места Фуш и Петивар. Во објектите биле откриени вкупно 1.878 растенија, како и 17 килограми марихуана. Според проценките на истрагата, производството и продажбата можеле да донесат повеќе од три милиони евра. Обвинителството тврдeло дека станувало збор за организирана активност со поголем обем, додека обвинетите ја оспорувале својата улога во трговијата со дрога.

Грабовац пред судот изјавил дека првично дошол во Белгија поради фудбалот и скаутирањето играчи, а одгледувањето канабис го опишал како дополнителна дејност.

„Со тоа завршив засекогаш“, порачал поранешниот фудбалер за време на судскиот процес, пренесуваат белгиските медиуми.

Роден во Рума на 16 јуни 1983 година, Грабовац најголемиот дел од својата играчка кариера ја поминал во Холандија. Од 2005 до 2011 година настапувал за Фортуна Ситард, за која забележал 193 првенствени настапи и 17 голови. Во кариерата играл и за Хелмонд Спорт, Вилем II и Блекпул.

Случајот претставува сериозен пресврт во животната приказна на поранешниот професионален фудбалер, кој по завршувањето на играчките денови се најде во центарот на судски процес поврзан со производство на канабис.