Германија доживеа нов шок на Светското првенство во Бостон, откако по вистинска драма беше елиминирана од аутсајдерот Парагвај. Јужноамериканците покажаа неверојатно срце и дефанзивна дисциплина, издржувајќи го страшниот германски притисок во текот на сите 120 минути (1:1), за на крајот да слават со 4:3 по изведувањето на најстрогите казни. Апсолутен херој на овој историски триумф е парагвајскиот голман Орландо Хил, кој се претвори во несовладлива планина на голот и со две клучни одбрани ги испрати „панцерите“ дома. Интересно е што ова е првпат во мундијалската историја Германија да биде елиминирана на ваков начин, откако претходно имаше четири успешни серии во пенал-завршниците.

Избраниците на Јулијан Нагелсман ја имаа целосната контрола врз играта и посед на топка од дури 80 проценти, но паднаа во истата тактичка стапица како и на дуелот со Еквадор во групната фаза. Нивните безидејни напади и постојани нафрлувања од крилните позиции беа лесен плен за цврстиот парагвајски бедем. Јужноамериканците трпеливо ја чекаа својата шанса и сурово ги казнија Германците буквално од првата посериозна акција. На Галарза му беа доволни само 23 секунди поминати на противничката половина за да испрати брилијантен центаршут, кој нискиот Хулио Енсисо, со глава го претвори во гол, запишувајќи се во историјата како стрелец на првиот погодок за Парагвај во нокаут-фазите на светските шампионати.

Германскиот притисок конечно вроди со плод во второто полувреме кога Каи Хаверц со глава ја пренасочи острата топка на Флоријан Вирц за израмнување на резултатот. Сепак, Парагвајците не се скршија, туку со уште поагресивна игра успеаја да ги сопрат сите понатамошни налетови и да го одведат мечот во продолженија. Најголемото возбудување во дополнителните 30 минути се случи во 102. минута кога Џонатан Та ја затресе мрежата по еден корнер, но по интервенција на ВАР-собата, голот беше поништен поради претходен прекршок на Антон врз голманот Хил.

Драмата кулминираше во пенал-серијата каде што нервите на Германците комплетно попуштија. Голманот Хил веднаш во првата серија го скроти ударот на Хаверц, а подоцна го одбрани и шутот на Волтемаде. Иако Парагвајците исто така грешеа бидејќи Санабрија шутираше покрај голот, а Нојер го одбрани обидот на Балбуена, трагичар на вечерта стана дефанзивецот Џонатан Та, кој во клучниот момент ја префрли топката високо над пречката. Во решавачкиот обид, Канале остана ладнокрвен, го матираше искусниот Нојер за конечни 4:3 и ја потпиша една од најголемите сензации во модерната историја на Мундијалите, закажувајќи дуел против подобриот од мечот меѓу Франција и Шведска.