Панатинаикос продолжува со максимален ефект во новата сезона од Евролигата, откако пред своите навивачи убедливо го совлада Макаби Тел Авив со 90-67. Домашниот тим уште од самиот почеток го презеде контролата и по 6-6 направи серија од 8-0, со која најави дека нема да дозволи неизвесен натпревар. Цврстата одбрана на Панатинаикос го ограничи Макаби на само десет поени во првата четвртина, а на полувреме разликата веќе беше 43-24.

Во продолжението немаше промена на односите на теренот. Тимот на Жељко Обрадовиќ продолжи да го диктира ритамот, а во последната четвртина стигна и до највисоките плус 30 (84-54). Најдобар стрелец кај победникот беше Гершон Јабуселе со 17 поени, додека Најџел Хејс-Дејвис при враќањето на теренот постигна 13. Силвен Франциско и Лефтерис Манцукас додадоа по 11, а Исак Бонга заврши со 10 поени.

Кај Макаби, Роман Соркин беше најефикасен со 13 поени и единствен со двоцифрен учинок. Панатинаикос по три одиграни кола има три победи, додека Макаби останува без триумф.