Фантастичното издание на Новак Ѓоковиќ во четвртфиналето на АТП 500 турнирот во Пекинг импресионираше многумина, а посебно неговиот следен ривал, Данил Медведев. Пред денешната полуфинална пресметка, рускиот тенисер во свој препознатлив стил ги прокоментира долговечноста и квалитетот на српскиот ас.

„Ова што го прави Ѓоковиќ едноставно не е нормално, пред сè поради неговите години. Многупати сме играле еден против друг и сигурен сум дека повторно ќе уживам на теренот. Можеби Новак повеќе не доминира како во деновите кога освојуваше по три гренд слема годишно, но и понатаму е страшно тежок противник.“

Ова ќе биде нивни 16-ти меѓусебен дуел, во кој Ѓоковиќ има предност од 10-5 во победи. Најважниот триумф за Медведев останува оној од финалето на УС Опен во 2021 година, кога го спречи Србинот да стигне до календарски Гренд слем, а нивната последна пресметка исто така се одигра во Њујорк во 2023 година, кога Ѓоковиќ му се реваншираше за тој пораз.

Медведев се наоѓа во одлична форма откако ја освои титулата во Хангџоу, а во четвртфиналето во Пекинг славеше против Франциско Черундоло со 7-6 (4), 6-3. Со овој пласман Русинот веќе обезбеди враќање на петтото место на АТП-листата, претекнувајќи го Феликс Оже-Алијасим.

Во второто полуфинале од турнирот во кинеската престолнина ќе ги одмерат силите Алекс де Минор и Хуберт Хуркач.