И покрај сè поголемите финансиски предизвици и комплицираниот буџет, Оклахома Сити Тандер заврши огромна работа и успеа да задржи еден од клучните столбови во својата шампионска ротација. Стартниот центар Ајзеа Хартенштајн се договори за нов тригодишен договор вреден 75 милиони долари, со што неговата вкупна заработка во Оклахома ќе достигне 134 милиони долари за пет сезони поминати во франшизата.

За да го реализира овој маневар, управата на Тандер ја одби тимската опција од 28,5 милиони долари за претстојната сезона и веднаш му понуди нов договор на германскиот кошаркар под поинакви услови. Овој паметен потег на менаџментот веднаш го намали притисокот врз „селери кепот“ за следната година и ќе му помогне на клубот да остане под границата за плаќање на казнениот данок на луксуз.

Хартенштајн пристигна во Оклахома во 2024 година како слободен агент и експресно стана незаменлив дел од системот на тренерот Марк Дајнолт. Со сигурен „дабл-дабл“ ефект и просек од 10,3 поени и 10,1 скокови по натпревар, тој беше вистинска сила под обрачите, стартувајќи во речиси сите клучни мечеви во регуларниот дел и во плејофот. Оваа финансиска флексибилност сега му овозможува на тимот полесно да го гради и чува моќното јадро околу првите ѕвезди Шеј Гилџис Александер, Чет Холмгрен и Џејлен Вилијамс во походите кон нови титули.