Она што се случи вечерва во Охрид е повеќе од спортски успех, тоа е магична ноќ која ќе остане врежана во меморијата на градот и македонскиот ракомет засекогаш. „Гладијаторите“ покажаа дека со челична волја и лавовско срце не постојат граници, испишувајќи ги златните страници на својата историја пред преполните трибини кои гореа од емоции. Овој успех е круна на еден амбициозен проект кој го врати охридскиот спорт на европската мапа со голем стил.
Натпреварот во „Билјанини извори“ беше вистинска рововска битка која го оправда епитетот полуфинале. По тесниот пораз во Словенија, охриѓани одиграа машки и во регуларниот дел славеа со 25:24. Се чинеше дека финалето е обезбедено кога Лиапис погоди за 25:23 на десет секунди до крајот, но Целје преку Анжиќ успеа да изнуди пенали во последната секунда.
Во серијата седмерци, на сцената стапи неверојатниот голман Пилиповиќ, кој по 12-те одбрани во регуларниот дел, израсна во апсолутен херој. Тој ги сопре ударите на Анжиќ и Макуц, носејќи му победа на Охрид од 4:3 во пенал-рулетот. Со овој триумф, избраниците на Борис Ројевиќ го чекираа билетот за големото финале на Европскиот куп на ЕХФ, каде ги чека пресметка со унгарската Татабања. Охрид вечерва не спие, а македонскиот ракомет има нова причина за гордост!
