ГРК Охрид продолжува да ја потврдува одличната форма пред стартот на новата сезона. Охриѓани по вторпат во само седум дена го совладаа Вардар во финале, овојпат со 29-27, и повторно го кренаа трофејот на меморијалниот турнир „Крсте Андоновски“. Домашниот состав одигра зрело и дисциплинирано, а иако Вардар во поголемиот дел од мечот беше рамноправен противник, Охрид во клучните моменти имаше повеќе концентрација и заслужено стигна до победата.

Првото полувреме донесе израмнета и цврста борба, во која ниту една од екипите не успеа да направи посериозна разлика. Во финишот од првиот дел Охрид беше за нијанса подобар и на одмор замина со предност од 12-10. Охриѓани го контролираа резултатот и во продолжението. Предноста во второто полувреме најчесто се движеше меѓу два и четири гола, а домашниот тим во финишот успеа да ја зголеми разликата. По голот на Доминик Мате на пет минути до крајот, Охрид стигна до највисоките плус пет – 26-21.

Вардар не се предаде и до самиот крај се обидуваше да се врати во игра, но избраниците на Ројевиќ успешно го задржаа водството и го прославија конечниот триумф од 29-27. За Охрид ова беше уште една значајна победа над големиот ривал, откако истиот противник беше совладан и во финалето на турнирот во Струга пред само една недела.