Светскиот рели шампионат ВРЦ официјално го потврди натпреварувачкиот календар за 2027 година, кој ќе содржи дури 15 трки. Главните адути во ажурираниот распоред се долгоочекуваното враќање на светската елита во Соединетите Американски Држави и Обединетото Кралство, како и престижното деби на Релито Италија со брзински испити низ улиците и околината на Рим.
Календарот, кој доби зелено светло од Светскиот совет за мотоспорт на ФИА, носи комбинација од традиционални класици и нови стратешки дестинации, додека шампионатот влегува во сосема нова ера со воведувањето на техничките правила „WRC27“. Меѓу најголемите вести е Релито САД (26 – 29 август), што ќе биде прво појавување на оваа серија на американско тло од 1988 година. Велика Британија се враќа за првпат по 2019 година преку Релито Шкотска (30 септември – 3 октомври) со центар во Абердин, додека асфалтното Рели Италија (8 – 11 јули) ги преселува возбудувањата во регионот Лацио и самиот главен град.
Новата сезона традиционално започнува со Релито Монте Карло (21 – 24 јануари), по што следуваат Шведска и Кенија. Следува серија од три асфалтни трки во Хрватска, Канарските Острови и Јапонија, пред Релито Акрополис во Грција да ја отвори летната европска серија на чакал. По брзите испити во Естонија и Финска, следува јужноамериканскиот блок во Парагвај и Чиле, додека големото завршно финале е закажано за Релито Саудиска Арабија од 25 до 28 ноември.
Генералниот директор на промоторот на ВРЦ, Ерик Булие, го истакна значењето на новиот распоред и новата техничка ера за развојот на овој спорт:
„Сезоната 2027 го означува почетокот на возбудливо ново поглавје за Светското првенство во рели. Овој календар ја одразува нашата амбиција да изградиме посилна, подостапна и вистински глобална тркачка серија. Враќањето во САД и Велика Британија, заедно со вклучувањето на култна дестинација како Рим, отвора огромни можности за нашите партнери, производители и навивачи. Во комбинација со новите технички регулативи, имаме единствена можност да ја обликуваме иднината на спортот и да го направиме релито достапно за уште поголем број луѓе ширум светот.“
Which round will we see you at in 2027? 🤩
#WRC https://t.co/2HYYJ7Icgq
— FIA World Rally Championship (@OfficialWRC) October 8, 2026