Светското првенство како по правило секогаш лансира херои кои доаѓаат комплетно „под радарот“ на големите суперѕвезди, а дефинитивно највпечатливата сторија на овој шампионат му припаѓа на колумбискиот десен бек Даниел Муњоз. Фудбалерот на Кристал Палас со два погодоци во првите две кола ја лансираше Колумбија директно во нокаут-фазата, профилирајќи се во неочекуван прв стрелец на својот национален тим. Иако неговите брутални физички предиспозиции, брзина на спринтер и карактеристичниот силен удар одамна им се добро познати на фудбалските сладокусци, патот на овој 30-годишен дефанзивец до најголемата сцена е вистинска холивудска драма.

Израснат во пренаселените и сиромашни квартови на Медељин, Муњоз во тинејџерските денови бил ситен деликвент и активен член на фанатичната навивачка група „Лос дел Сур“, бодрејќи го локалниот Атлетико од навивачкиот коп. На 16-годишна возраст, додека неговите врсници граделе кариери, тој бил експресно одбиен од дури седум клубови кои не сакале да ризикуваат со момче со такво бурно минато. Притиснат до ѕид и без денар во џебот, Муњоз донел одлука засекогаш да крене раце од фудбалот за да најде обична работа и да му помогне на семејството да преживее. Колумбиските медиуми денес отворено пишуваат дека тој сигурно би завршил во криминалните води, доколку чистиот инает и лудата љубов кон спортот не превладале во последен момент.

„Не е важно кој ги постигнува головите, најважно е што Колумбија победува. Го заслуживме сето ова што ни се случува на Мундијалот“, изјави скромниот Муњоз по примањето на наградата за играч на натпреварот против ДР Конго.

Својата прва професионална шанса ја дочекал неверојатно касно, дури на 20 години во тимот на Агилас Дорадос, што беше почетна точка за неговиот метеорски излив кон елитата. Набрзо направи трансфер во неговиот сакан Атлетико Насионал, од каде во 2020 година се пресели во белгиски Генк за 4,5 милиони евра.  Лавовското срце на теренот му донесе трансфер во Премиер лигата, каде Кристал Палас го купи за скромни осум милиони евра.

Денес, од момче кое правеше матни зделки на улица за да заработи неколку пезоси, Муњоз има неделна плата од 55.000 фунти и стана дури петтиот дефанзивец во историјата на Светските првенства кој постигнал гол во првите два натпревари на отворањето. По ваквите одлични партии во групата, неговиот Кристал Палас во рацете држи вистинска „златна кокошка“, околу која богатите европски гиганти допрва ќе водат војна во претстојниот трансфер период.