Белоруската тенисерка Арина Сабаленка продолжува да се соочува со сериозен пад во формата, а кризата доби нова потврда со неочекуваната елиминација на турнирот во Пекинг. Големата фаворитка не успеа да го најде вистинскиот ритам и претрпе уште еден пораз во периодот во кој резултатите се далеку од очекувањата.

Сабаленка беше совладана од Чехињата Никола Бартункова со 2-0, по сетови 6-3 и 6-4. Натпреварот траеше 94 минути, а Бартункова одигра исклучително зрело и дисциплинирано против противничка која на хартија беше голем фаворит. Чехињата уште во првиот сет покажа дека нема намера да и ја препушти иницијативата на Сабаленка. Со еден направен брејк го презеде водството, а потоа сигурно го одржа до крајот на сетот за 6-3.

Во вториот сет проблемите за Сабаленка станаа уште поочигледни. Бартункова двапати го одзеде сервисот на Белорусинката, додека Сабаленка во клучните моменти не успеа да ја пронајде својата препознатлива моќна игра. Нејзините грешки дополнително ѝ ја олеснија работата на Чехињата, која без поголеми осцилации го приведе мечот до крај.

За Бартункова ова е убедливо една од најзначајните победи во кариерата, додека за Сабаленка елиминацијата претставува уште еден сериозен аларм. Белорусинката во текот на сезоната покажа дека може да доминира со најдобрите, но последниот период носи сè повеќе прашања околу нејзината форма, сигурност и стабилност во играта.