Пјер-Емерик Обамејанг повеќе нема да го носи дресот на Габон. Искусниот напаѓач и капитен на репрезентацијата одлучи да стави крај на настапите за националниот тим, откако последните случувања околу селекцијата сериозно го нарушиле неговиот однос со тамошните власти. Обамејанг, кој важи за најдобар стрелец во историјата на габонската репрезентација, беше меѓу оние кои се најдоа на удар по разочарувачкиот настап на Купот на африканските нации. Габон турнирот го заврши уште во групната фаза со три порази, по што уследија сериозни промени, но и критики кон дел од репрезентативците.

Особено тешко за Обамејанг било тоа што одлуката за негово отстранување не дошла од фудбалската федерација, туку од државните структури. Владата привремено го суспендираше националниот тим, го распушти стручниот штаб и од селекцијата ги отстрани Обамејанг и Бруно Екуеле Манга.

„Ме понижија и ми го извалкаа името. На турнирот настапував иако бев повреден. Сметам дека проблемите се многу подлабоки, но ова за мене беше последната капка. Затоа решив да ставам крај“, порача Обамејанг.

И покрај разочарувањето со репрезентацијата, 37-годишниот напаѓач продолжува да игра на клупски план. Од летово е член на Депортиво Ла Коруња, а сезоната ја започна во одличен ритам, постигнувајќи по еден гол на секој од првите три натпревари. Обамејанг зад себе остава долгогодишна репрезентативна кариера и статус на еден од најзначајните фудбалери во историјата на Габон. Неговото заминување претставува голем удар за националниот тим, особено во период кога селекцијата се соочува со сериозни проблеми надвор од теренот.