Фудбалската грозница на Островот го достигнува својот зенит, каде секој преостанат натпревар до крајот на сезоната е со тежина на финале. Додека некои ги пакуваат куферите за понизок ранг, други се во нестварен јазол помеѓу европскиот сон и стравувањето за гол прволигашки живот.
Додека Барнли и Вулверхемптон веќе се помирија со преселбата во Чемпионшип, последното слободно место во „возот за испаѓање“ е резервирано за некој од лондонските ривали, Вест Хем или Тотенхем. Тотенхем во моментов има минимална предност од еден бод, што ветува пеколни 270 минути фудбал во завршните три рунди од сезоната 2025/26.
Во фокусот на попладневната програма е пресметката на „Сити Граунд“ во Нотингем. Домаќинот, кој сè уште ги лечи раните по тешкиот пораз во полуфиналето на Лига Европа, го пречекува тимот на Њукасл. „Страчките“ се наоѓаат во можеби најбизарната позиција во поновата историја на Премиер лигата. Со 45 бодови на 13-тата позиција, тие математички се во игра за два екстремно различни епилози.
Имено, Њукасл заостанува осум бодови зад Брајтон и европските позиции, што со малку среќа и серија победи би можело да ги однесе на меѓународна сцена. Сепак, парадоксот е во тоа што имаат само девет бодови повеќе од загрозениот Вест Хем. Иако „црното сценарио“ за испаѓање бара вистински хичкоковски заплети и серија неверојатни резултати кај конкурентите, самата помисла на такво нешто им предизвикува главоболка на навивачите на „црно-белите“.
Натпреварот меѓу Нотингем Форест, каде столб на одбраната е Никола Миленковиќ, и гостите од Њукасл започнува во 15 часот, во дуел кој за двете екипи е последна станица пред дефинитивното кроење на плановите за летово.
