Екипата на ГФК Тиквеш запиша уште еден убедлив триумф во Првата македонска фудбалска лига, совладувајќи го Башкими на гостувањето во Куманово со високи 5:0. По победата над Арсими, кавадарчани одиграа уште еден доминантен натпревар и со целосна контрола на теренот заслужено ги освоија трите бода за останување на самиот врв од табелата.

Иако почетокот донесе израмнета и испрекината игра, кавадаречкиот состав го разби домашниот бедем во 36. минута кога Виздом погоди на асистенција на Лусианињо. Само неколку минути подоцна Лавал го зголеми водството на 0:2, со што Тиквеш замина на пауза со сигурна предност. Во второто полувреме Башкими целосно се распадна по 70. минута, што гостите сурово го казнија.

Лавал со атрактивен втор гол зголеми на 0:3, а по поништениот погодок на Ренатињо, Попзлатанов во 81. минута донесе четири голови предност. Точка на доминацијата и конечните 0:5 ги постави Ацковски со прекрасен удар од далечина во 88. минута, потврдувајќи ја фантастичната форма на Тиквеш на стартот од новата сезона.