Македонскиот боксер Ален Рустемовски продолжува со одличните настапи на Медитеранските игри во Таранто, откако обезбеди пласман во полуфиналето во својата категорија. Нашиот репрезентативец во четвртфиналната пресметка го совлада Албанецот, Ариол Зенели, покажувајќи уште еднаш дека се наоѓа во одлична форма. Рустемовски од самиот почеток на мечот наметна силно темпо, а неговата серија прецизни удари во третата рунда беше пресудна за конечниот исход.

Судијата ја прекина борбата, па македонскиот боксер славеше со технички нокаут и заслужено се пласираше меѓу најдобрите четворица. Со пласманот во полуфиналето, Рустемовски веќе обезбеди можност да се бори за медал на Медитеранските игри. Сега останува уште еден чекор до финалето и шанса за ново големо одличје за македонскиот бокс и за нашата репрезентација.