Норвешка го продолжува својот одличен настап на Светското првенство 2026, откако со победа од 2:1 над Брегот на Слоновата Коска обезбеди пласман во осминафиналето. Во натпревар исполнет со неизвесност и голема борба, повторно во центарот на вниманието беше Ерлинг Холанд, кој со погодок во самиот финиш ја донесе победата за „викинзите“.

Дуелот започна со офанзивен пристап на двете репрезентации. Веќе во третата минута Холанд се закани со удар со глава, но одбраната на африканската селекција навреме реагираше. Неколку минути подоцна возвратија и фудбалерите на Брегот на Слоновата Коска, кога Јан Диоманде шутираше со глава, но без поголема опасност по норвешкиот гол.

Во продолжението Африканците создадоа неколку ветувачки ситуации преку Конан и Никола Пепе, но недостасуваше завршницата. Норвежаните повторно се заканија во 37. минута, кога Холанд уште еднаш се обиде со глава, а голманот Јахија Фофана сигурно интервенираше. Само две минути подоцна Норвешка ја круниса својата иницијатива. Антонио Нуса одлично се снајде во противничкиот шеснаесетник и со прецизен удар донесе водство од 1:0. До крајот на првото полувреме Холанд имаше уште една голема можност да ја зголеми предноста, но неговиот удар беше изблокиран.

Во второто полувреме Брегот на Слоновата Коска тргна поизразено кон противничкиот гол и успеа да стигне до израмнување во 75. минута преку Амад Диало, кој ја врати неизвесноста во натпреварот. Сепак, кога изгледаше дека победникот ќе се решава по продолженија, на сцена стапи Ерлинг Холанд. Во 86. минута норвешкиот голгетер уште еднаш покажа зошто важи за еден од најдобрите напаѓачи во светот и со сигурна реализација ги постави конечните 2:1.

Со оваа победа Норвешка се пласираше меѓу најдобрите 16 селекции на Светското првенство и продолжува да ја живее својата мундијалска приказна, додека Брегот на Слоновата Коска го завршува настапот на турнирот по храбра, но недоволна борба.