Репрезентацијата на Норвешка си го осигура пласманот во следната фаза на Светското Првенство, откако во рамките на второто коло од групата и славеше над селекцијата на Сенегал со резултат 3-1. Скандинавците во поголемиот дел од натпреварот беа далеку подобар противник на теренот, а до новиот клучен триумф на турнирот ги предводеше фантастично расположениот Ерлинг Халанд, кој ја потврди својата класа со два постигнати погодоци.

Норвежаните уште од самиот почеток ја презедоа теренската иницијативата и постојано создаваа опасни прилики пред голот на Едуард Менди. Наградата за ваквата офанзивна игра пристигна во финишот на првиот дел, поточно во 43-тата минута, кога резервистот Маркус Педерсен, кој претходно влезе во игра поради принудната измена на повредениот Јулијан Риерсон, максимално ја искористи големата грешка на одбраната на Сенегал и донесе почетно водство од 1-0.

Почетокот на второто полувреме донесе нов тежок удар за африканската селекција. Мартин Одегард испрати брилијантно додавање во празно, а напаѓачот на Манчестер Сити рутински ја спроведе топката во мрежата за зголемување на предноста на 2-0. Сенегал експресно возврати преку Исмаила Сар, кој успеа да ја намали негативата и за момент ја врати неизвесноста во овој дуел, но тоа само го налути првиот стрелец на Норвешка.

Веќе во 58-мата минута, Халанд уште еднаш сигурно ја затресе противничката мрежа и ја врати комотната предност од два гола за својата селекција. До крајот на средбата фудбалерите на Сенегал очајнички се обидуваа да нападнат и да извлечат нешто повеќе, а Сар во судиското продолжение имаше сериозна прилика дополнително да го ублажи поразот, но за каков било пресврт едноставно немаше време. Со оваа втора победа во групата, Норвешка веќе го визираше своето место во нокаут-фазата, додека Сенегал остана закован на дното без бодови и се наоѓа пред елиминација од Мундијалот.