Актуелниот шампион во Формула 1, Ландо Норис, влезе во фантастична серија по летната пауза запишувајќи две последователни победи во Унгарија и Холандија. Сепак, и покрај тоа што го намали заостанувањето зад лидерот во генералниот пласман Кими Антонели на 83 бода, Британецот останува реален околу шансите за одбрана на круната, посочувајќи ги сериозните недостатоци на Мекларен на бавните патеки што следуваат во Монца и Азербејџан.

Норис отворено ги дефинираше предностите и слабостите на својот болид во однос на ривалите од Мерцедес, истакнувајќи дека Мекларен има доминација единствено во брзите кривини.

„Самоуверен сум бидејќи очигледно имаме силен болид, но само во одредени сегменти. Мојата предност во однос на Мерцедес во седмата и осмата кривина во Зандворт беше луда, но нивната предност во однос на нас во бавните кривини е исто така луда. Затоа немам самодоверба да кажам дека можам да се борам за шампионатот оваа сезона“, призна Норис.

Британскиот возач не се воздржа од сурова проценка, свесен за тешкиот испит што ги чека во продолжението од шампионатот.

„Знам дека штотуку победив на две трки по ред и имав две пол-позиции, но во овој момент го немам болидот што ми е потребен за борба за шампионатот. Знам дека тоа е прилично голема изјава. Зад нас се два одлични викенди, но сè уште има многу работи што можеме подобро да ги направиме. Ќе продолжиме да работиме најдобро што можеме бидејќи има уште многу трки и можности за сите“, заклучи возачот на Мекларен.