Големата еуфорија во таборот на Бетис по спектакуларниот пресврт против Порто беше засенета од непријатна вест за Антони. Бразилскиот фудбалер откри дека додека неговиот тим го играл натпреварот, крадци провалиле во неговиот дом и однеле повеќе лични предмети. Поранешниот играч на Манчестер Јунајтед ја сподели својата болка преку социјалните мрежи, истакнувајќи дека најтешко му паѓа нарушеното чувство на сигурност кај неговото семејство.

Антони нагласи дека материјалната штета не е најважна, туку стравот и вознемиреноста што ги доживеале неговите најблиски.

„Нема материјално богатство повредно од животот и благосостојбата на моето семејство. Сè што изгубивме можеме повторно да го стекнеме. Работата продолжува, соништата остануваат, а желбата за победа е сè уште силна“, порача Бразилецот.

Тој додаде дека најголемата вредност за него се луѓето со кои го дели животот, а не предметите што ги поседува. И покрај гневот и чувството на несигурност, фудбалерот испрати порака дека неговото семејство ќе остане сплотено и подготвено да го надмине и овој тежок момент. Така, вечерта што требаше да остане запаметена по големиот успех на Бетис доби сосема поинаков тек за Антони, кој сега се соочува со непријатните последици од провалата во неговиот дом.