По точно две децении професионална кошарка и 18 незаборавни сезони на најголемата светска сцена во НБА лигата, францускиот ас Николас Батум на 37-годишна возраст и официјално реши да стави крај на својата богата кариера. Датумот и симболиката во неговиот потег беа моќни, тој го избра 21 септември за збогување, на денот кога се одбележуваат точно 35 години од смртта на неговиот татко.

Батум ја објави својата одлука преку исклучително трогателно видео снимено во скромната сала каде што како момче ги направи своите први кошаркарски чекори. Заедно со својот син, искусниот крилен кошаркар одржа емотивен разговор, порачувајќи дека е време да се врати дома и да им го препушти местото на новите генерации.

Зад него останува огромно НБА наследство. Избран како 25-ти пик на драфтот во 2008 година од Хјустон и веднаш префрлен во Портланд, Батум во кариерата ги носеше уште и дресовите на Шарлот, Лос Анџелес Клиперс и Филаделфија. Со зад себе 1.205 одиграни мечеви во регуларниот дел и уште 76 во плејофот, тој ги запечати своите бројки како втор најдобар Французин во историјата на лигата по одиграни натпревари и постигнати поени (11.553), веднаш зад недостижниот Тони Паркер. Дополнително, неговите 1.842 погодени тројки го прават убедливо најдобриот француски стрелец од дистанца во НБА и го сместуваат меѓу 30-те најдобри тројкаши во историјата на кошарката.

Подеднакво важен белег Батум остави и во францускиот национален дрес. На 177 натпревари за „триколорите“, тој освои дури седум медали од големите натпреварувања, предводени од европското злато на Евробаскетот во 2013 година и двете олимписки сребра. Неговиот последен репрезентативен танц беше токму пред домашната публика во грандиозното финале на Олимписките игри во Париз 2024 против САД, по што замина во легендите како еден од заштитните знаци на најтрофејната француска генерација.