Немања Радоњиќ повторно ќе го носи дресот на Чукарички, клубот во кој помина дел од најубавите моменти во својата кариера. Искусниот офанзивец се врати на Банoво Брдо во период кога тимот се соочува со резултатски проблеми, а неговото доаѓање треба да донесе дополнителен квалитет и свежина во нападот.

Српскиот фудбалер откри дека договорот со раководството на клубот бил постигнат без поголеми тешкотии. Добро ја познава средината, луѓето во клубот и начинот на работа, па враќањето го доживува како продолжување на една добро позната приказна.

„Знам како функционираат работите тука и во тој поглед ништо не е променето. Повторно ќе го носам бројот 28, кој ми донесе среќа и претходниот пат. На Банoво Брдо ги поминав едни од најубавите моменти во кариерата, а ми е драго што во клубот сè уште има луѓе како Владимир Матијашевиќ, со кого многу лесно постигнавме договор“, изјави Радоњиќ.

Поранешниот српски репрезентативец е свесен дека Чукарички моментално не се наоѓа во посакуваната ситуација, но верува дека екипата има потенцијал да ги подобри резултатите. Во составот има голем број фудбалери со кои веќе се познава, што би можело да му го олесни вклопувањето во тимот.

„Во екипата има многу познати имиња. Со некои сум играл заедно, додека против повеќето сум се соочувал како противник. Добро се познаваме. Позицијата на табелата не е добра, но ќе се обидеме да ја промениме. Едвај чекам повторно да бидам на теренот“, порача офанзивецот.

Во меѓувреме, Чукарички донесе уште една важна одлука. Поради серијата слаби резултати, клубот ја прекина соработката со тренерот Марко Јакшиќ, па тимот во наредниот период ќе мора да се подготвува и за предизвикот со изборот на нов стратег. Раководството веќе е во потрага по негов наследник, кој ќе има задача да ја стабилизира екипата и да ја врати на победничкиот пат. Во такви околности, враќањето на Радоњиќ претставува позитивен сигнал за навивачите на Чукарички, кои очекуваат подобри денови за својот клуб.