Најдобрата можна вест пристигна во таборот на Бразил пред одлучувачката пресметка од третото коло во групата Ц на Светското Првенство. Селекторот Карло Анчелоти потврди дека првата ѕвезда Нејмар комплетно се рехабилитираше од повредата и е максимално подготвен за вечерашниот дуел против Шкотска во Мајами. Офанзивецот ги пропушти првите два меча против Мароко и Хаити, но по интензивните тренинзи неделава, стручниот штаб доби зелено светло за негово враќање во игра, без разлика дали ќе добие едно полувреме или ќе ги одигра комплетните 90 минути. Анчелоти не го криеше задоволството од позитивниот став и искуството на својот лидер, чие враќање носи огромно олеснување во тимот.

Сепак, Јужноамериканците нема да бидат комплетни на овој меч бидејќи надвор од комбинација поради повреда останува крилниот напаѓач Рафиња. Наспроти нив стои цврстата и крајно незгодна селекција на Шкотска, за која италијанскиот стратег покажа огромен респект, посебно издвојувајќи ги Скот Мектоминеј и Џон Мекгин како двигатели на противникот. Пред полноќниот расплет во Мајами, Бразил и Мароко го предводат поредокот со по четири бода, Шкотите демнат веднаш зад нив со три, што ветува бескомпромисна мундијалска војна за пласман во следната фаза.