НБА прави нов чекор кон технолошки посовремено судење. Во дел од подготвителните натпревари лигата тестира две новини – Вилсон топка со вграден блутут сензор и уреди на зглобовите на судиите, кои би можеле во иднина да помогнат при носењето одлуки и да го скратат времето поминато во прегледување снимки.

„Паметната“ топка засега служи само за собирање податоци и нема директно влијание врз судиските одлуки. НБА и Вилсон не откриваат целосно кои информации ги регистрира сензорот, но технологијата би можела во иднина да помогне при ситуации како последен допир, моментот на шутот или други спорни детали.

Втората новина е појасно насочена кон комуникацијата. Судиите ќе користат уреди на зглобовите за побрза размена на информации со центарот за видео-прегледи, особено при ситуации поврзани со проверка на одлуки, резултатот или истекот на времето. НБА веќе работи и на поширока примена на технологијата за следење на движењето на играчите и топката во три димензии. Целта е во иднина одредени спорни ситуации да се решаваат побрзо и попрецизно, без долги прекини.

Сепак, засега станува збор само за тестирање. Технологијата нема да биде користена во регуларната сезона 2026/27, а резултатите од овие експерименти ќе покажат дали НБА е подготвена за следниот чекор кон целосно технолошки поткрепено судење.