МЗТ Скопје Аеродром го претстави првото странско засилување за новата сезона, откако редовите на македонскиот шампион ги засили босанскиот центар Емир Крајиниќ. Станува збор за 24-годишен кошаркар висок 208 сантиметри, кој настапува на центарската позиција и зад себе има настапи во босанското и словенечкото првенство.

Крајиниќ ја започна професионалната кариера во Слобода Тузла, а потоа го носеше дресот на Промо, каде што имаше просек од 13 поени и 7,4 скока по натпревар. Минатата сезона настапуваше за словенечкиот Златорог Лашко, бележејќи во просек 12,5 поени и 7,1 скок. Со неговото доаѓање, МЗТ Скопје продолжува да го комплетира ростерот за сезоната во која клубот ќе се натпреварува во ФИБА Еврокупот, АБА2 лигата и домашното првенство.