Македонскиот шампион МЗТ Скопје продолжува со комплетирањето на ростерот за новата сезона, а најново засилување на „сино-белите“ е американскиот кошаркар Лесли Ворнер. Крилниот играч и официјално стави потпис на договорот со клубот и ќе биде дел од тимот во претстојните предизвици. Дваесет и осумгодишниот Ворнер зад себе има богато европско искуство, кое го започна по завршувањето на колеџ-кариерата на Универзитетот Рио Гранде. Првиот професионален ангажман во Европа го имаше во Австрија, во екипата на Грац, а истата сезона настапуваше и за британски Њукасл.

Во последните неколку сезони играчот ги бранеше боите на Капфенберг, Славија Прага, Усти над Лабем, Короивос, а минатата сезона беше дел од литванскиот прволигаш Јонава. Важи за кошаркар кој има голем придонес и во нападот и во скокот, а честопати натпреварите ги завршува со дабл-дабл ефект. Со неговото доаѓање, Ворнер станува трето странско засилување на МЗТ Скопје ова лето, по Ноа Фарахан и Емир Крајиниќ. Во составот остануваат и искусните браќа Стојановски, како и Андреј Маслинко, Андреј Андоноски, Лука Стојановски и Никола Василевски, додека екипата и натаму ќе ја предводи тренерот Васко Атанасов.

Во сезоната што претстои, МЗТ Скопје ќе се натпреварува во домашниот шампионат, АБА2 лигата и ФИБА Еврокупот, со амбиција за успешни настапи на сите фронтови.