По долги години пауза, европската кошарка повторно се игра во Аеродром, но враќањето на МЗТ Скопје на меѓународната сцена не донесе победничка премиера. Аеродромци имаа шанса пред домашната публика да запишат важен триумф, но еден пад во концентрацијата во клучните моменти беше доволен за гостите да ја преземат контролата. Натпреварот долго време беше во резултатска рамнотежа, но Ираклис покажа повеќе смиреност кога се кршеше резултатот.

Македонскиот кошаркарски првак МЗТ Скопје не успеа со победа да го одбележи враќањето во европските купови, откако на домашен терен загуби од грчки Ираклис со 59-64.
Избраниците на Васко Атанасов одиграа борбен и неизвесен натпревар, во кој долго време беа рамноправен противник на грчкиот состав. И по првите 20 минути разликата беше минимална, бидејќи Ираклис на паузата замина со предност од само еден поен (39-40).

Ниту продолжението не донесе сериозно резултатско одвојување. Двата тима се менуваа во водство, а МЗТ во завршницата влезе со реални шанси да дојде до победата. Сепак, токму тогаш гостите беа посконцентрирани. При резултат 57-58, Ираклис врза два успешни напади и преку Мелвин и Џејлен Лекју стигна до предност од 57-62. МЗТ се обиде да одговори, но немаше доволно време и прецизност за целосен пресврт. Лекју беше најдобар поентер кај гостите со 18 поени и беше единствениот кошаркар на Ираклис со двоцифрен учинок. Кај МЗТ Скопје, Ноа Али Фаракан исто така постигна 18 поени, додека Лесли Варнер заврши со 11.

Иако резултатот не беше посакуваниот, МЗТ покажа дека може да се носи со Ираклис во натпревар кој до самиот финиш беше отворен. Аеродромци сега ќе имаат нова можност за прва победа во Европа пред својата публика.
Во второто коло од ФИБА Европа Купот, МЗТ Скопје повторно ќе биде домаќин, а во Скопје ќе гостува естонски Тарту.