Специјалниот се соочува со еден од најтешките периоди во неговата богата кариера, откако и официјално стана јасно дека неговата ризница со пехари ќе остане празна и оваа сезона. Жозе Мурињо и неговата Бенфика капитулираа во трката за шампионскиот трон во Португалија, каде лутиот ривал Порто успеа предвреме да го завери првото место. Она што го прави овој пораз уште поболен е нестварната статистика на „орлите“, тие се сè уште непоразени во домашното првенство со 22 победи и 10 ремија, но дури и таквата доминација не беше доволна за да се сопре залетаниот Порто.
Последната голема радост на португалскиот стратег датира од 2022 година, кога со Рома го освои премиерното издание на Конференциската лига на УЕФА. Оттогаш, Мурињо како да ја изгуби својата „магија“ за финалиња и клучни бодови, што предизвикува бројни дебати меѓу фудбалските аналитичари за тоа дали неговите методи полека застаруваат. Оваа сезона во Лисабон требаше да биде негова голема рехабилитација, но наместо тоа, Жозе ќе мора да се задоволи со епитетот „најдобар меѓу поразените“. Притисокот врз него расте, а прашањето е дали управата на Бенфика ќе има трпение за уште еден обид следната година или пак Мурињо повторно ќе ги пакува куферите во потрага по нова средина каде ќе може да го прекине овој четиригодишен пост. Навивачите се разочарани бидејќи ретко кога се случува еден тим да не биде поразен цела сезона, а сепак да остане без највредниот пехар во своите витрини.
