МотоГП се соочува со нова промена во календарот за 2026 година, откако сè поизвесно е дека Големата награда на Катар нема да се одржи. Според најновите информации, трката нема да биде заменета со друга, па шампионатот би продолжил со 21 наместо планираните 22 трки.

Катарската трка првично требаше да се вози во април, но поради нестабилната геополитичка ситуација на Блискиот Исток беше одложена за 8 ноември. Во март, МотоГП официјално го потврди новиот термин, заедно со промените на датумите на трките во Португалија и Валенсија. Во изминатиот период се разгледуваа различни можности за спасување на местото во календарот. Како една од опциите се споменуваше и дополнителна трка во Малезија, односно двоен викенд на „Сепанг“, но таа идеја во меѓувреме е напуштена.

Дополнителен проблем е безбедносната ситуација во регионот. Поради неизвесноста околу патувањето и одржувањето на големи спортски настани, МотоГП подолго време беше во разговори со катарските власти. Карлос Езпелета неодамна потврди дека преговорите сè уште траат, но дека конечната одлука треба да биде донесена навреме за тимовите и возачите да можат да ги планираат последните трки од сезоната.

Интересно е што официјалниот календар на МотоГП сè уште ја прикажува трката во Катар за 6–8 ноември, што значи дека формалната потврда за откажување сè уште се очекува. Во меѓувреме, неизвесност постои и околу Формула 1. За разлика од МотоГП, таму засега нема одлука за откажување на Големата награда на Катар. Ф1 во јули соопшти дека Катар и Абу Даби остануваат планирани за завршницата на сезоната, но е подготвен и резервен европски план доколку ситуацијата во регионот не дозволи нивно одржување. Конечната проценка е најавена за средината на септември.

Доколку Катар навистина биде откажан без замена, MotoGP ќе има 21 трка во 2026 година, со што сезоната ќе биде пократка од првично планираната. Сепак, за официјална потврда ќе треба да се почека конечната одлука од организаторите.