Бразил покажа сурова сила во генералната проба пред Светското првенство, победувајќи ја Панама со убедливи 6:2 на култниот стадион во Рио де Жанеиро. Избраниците на Карло Анчелоти со огромна самодоверба заминуваат на Мундијалот во поход по шестата светска круна, со јасна цел да го прекинат долгиот пост без трофеј.

„Кариоките“ ја отворија средбата експресно и поведоа уште во 2. минута со силен проектил на Винисиус Жуниор за 1:0. Панама шокантно израмни преку автоголот на Матеус Куња во 15. минута, но пред паузата капитенот Каземиро со глава ја врати предноста на својот тим за 2:1.

На полувремето Анчелоти направи радикален потег и смени дури десет фудбалери, по што бразилските резервисти приредија вистинско шоу на теренот. Рајан и Лукас Пакета набрзина погодија за 3:1 и 4:1, а потоа Игор Тијаго од пенал и Данило Сантос со вистинска магија зголемија на огромни 6:1. Конечните 6:2 ги постави Карлос Харви со прекрасен гол за Панама од преку 20 метри. Бразил сега патува за Америка на последен тест против Египет, додека Панама ќе ги темпира силите за историскиот дуел со Гана.