Кошаркарите на МЗТ Скопје продолжуваат со максимален ефект во домашната Суперлига, откако во дербито од третото коло го совладаа ТФТ со 70-66. Актуелниот шампион имаше контрола врз резултатот во најголемиот дел од натпреварот, но во завршницата мораше да одговори на сериозниот налет на гостите од Тафталиџе.

„Металците“ уште од самиот почеток покажаа дека се решени да ја продолжат победничката серија. Со убедлива игра во воведните минути, домашниот состав брзо се одлепи на двоцифрена предност, а првата четвртина ја заврши со убедливи 25-10.
ТФТ не успеваше да го пронајде вистинскиот ритам ниту во вториот период, па МЗТ ја задржа контролата и на одморот замина со предност од 41-28. Во третата четвртина двата тима одиграа израмнето, што му овозможи на шампионот да влезе во последните десет минути со комотна предност.

Сепак, драмата следуваше во завршницата. ТФТ постепено ја топеше негативата, а по тројката на Митревски на 88 секунди до крајот се доближи на само три поени негатива (67-64). Во тие моменти натпреварот повторно стана целосно неизвесен, но МЗТ успеа да остане смирен кога беше најпотребно. По неуспешните напади на двете страни, Војдан Стојановски реализираше едно слободно фрлање за 68-64, а потоа Тадиќ беше прецизен од линијата за слободни фрлања, поставувајќи ја предноста на 70-64 на 13 секунди до крајот. ТФТ успеа само да го ублажи поразот, па конечниот резултат гласеше 70-66.

Димитрије Николиќ со 15 поени беше најефикасен кај МЗТ Скопје, додека Тадиќ придонесе со 12 поени. На спротивната страна, Секоу Сила одигра одличен натпревар со 19 поени и 13 скокови, но неговиот учинок не беше доволен за ТФТ да избегне пораз.
Со овој триумф, МЗТ Скопје стигна до третата победа во исто толку натпревари и го задржа максималниот ефект на стартот од сезоната. ТФТ, пак, го забележа вториот пораз во домашното првенство.