Враќањето на НБА-лигата во Сиетл, каде што до 2008 година настапуваа легендарните Суперсоникс, повторно е доведено во прашање. Мексико Сити се појави како потенцијален кандидат за добивање франшиза при најавеното проширување на најсилната кошаркарска лига во светот, со што трката добива нова димензија.

Според информациите на новинарот на ESPN, Брајан Виндхорст, комесарот Адам Силвер на последната средба со сопствениците на клубовите посочил дека враќањето на НБА во Сиетл не е сигурно. Во меѓувреме, повторно се разгледува можноста за формирање клуб во мексиканската престолнина, каде што веќе постои интерес од потенцијални инвеститори. Како што пренесува ESPN, најмалку една инвестициска група од Мексико Сити веќе стапила во контакт со компанијата „PJT Partners“, која соработува со НБА во процесот на разгледување на можностите за проширување. Идејата не се однесува само на создавање нов клуб, туку вклучува и изградба на модерна арена со дополнителни комерцијални содржини.

Сепак, Лас Вегас засега останува еден од главните фаворити за добивање нова франшиза. Интересот од финансиски моќни инвеститори е голем, а според проценките, понудите за влез во лигата би можеле да достигнат меѓу 12 и 13 милијарди долари. Во трката за тим во овој град, наводно, се вклучени три инвестициски групи. Ситуацијата во Сиетл е поинаква. Според „The Athletic“, единствениот јавно познат кандидат заинтересиран за враќање на НБА-франшизата во градот е Саманта Холавеј, сопственичката на хокеарскиот клуб Сиетл Кракен. Недостигот од поширок интерес од инвеститорите може да претставува сериозна пречка за реализација на проектот.

Сиетл остана без својот НБА-тим во 2008 година, кога Суперсоникс се преселија во Оклахома Сити и го променија името во Тандер. Оттогаш, враќањето на кошарката во градот е една од најчесто споменуваните теми меѓу навивачите, но конкретна реализација сè уште нема. Потенцијалното проширување на НБА затоа отвора ново прашање: дали лигата ќе им даде приоритет на традицијата и враќањето на позната кошаркарска дестинација или на финансиските можности што ги нудат новите пазари? Засега нема конечна одлука, но вклучувањето на Мексико Сити во процесот значи дека навивачите на Суперсоникс можеби ќе мора да почекаат уште подолго за враќање на својот клуб.