Фудбалерите на Реал Мадрид извојуваа голема победа против Барселона со 2:1 на гостувањето на „Камп Ноу“ во дербито од 10. коло во шпанската Ла Лига, а апсолутен херој на вечерта беше францускиот голгетер Килијан Мбапе.

Мбапе ги доведе гостите во водство во 41. минута по грешка во каталонската одбрана, а потоа во 87. минута сурово круниса брза контра на асистенција на Едуардо Камавинга за голем триумф на „кралскиот клуб“.

„Ова беше тимска победа. Целиот состав беше херој бидејќи знаевме дека мора да одиграме зрело. Имавме тешки моменти, но и периоди во кои целосно доминиравме. Да се победи тука и да се остане во трката за титулата е најважно. Пет победи по ред? Во Реал Мадрид тоа не значи ништо, овде мора да се победува на секој меч“, истакна Мбапе за шпански „АС“.

Вториот погодок на мечот имаше и посебно историско значење за францускиот репрезентативец. Мбапе стигна до својот 100-ти официјален гол во дресот на Реал Мадрид, за што му беа потребни само 116 натпревари во сите натпреварувања од неговото доаѓање во летото 2024 година.

„Пресреќен сум за јубилејот и 100-тиот гол, но головите сега се во втор план. Најважно е што тимот зеде три бода и доби огромен мотив за продолжението од сезоната. Сигурен сум дека ме чекаат уште многу погодоци“, додаде францускиот ас.

Застрашувачкиот ефект на Мбапе во кралскиот клуб досега опфаќа 67 гола во Ла Лига на 75 мечеви, 25 гола во Лигата на шампионите на 28 натпревари, 4 погодоци во Купот на кралот, 2 на Светското клупско првенство, како и по еден гол во УЕФА Суперкупот и Суперкупот на Шпанија.