Мартин Мирчевски повторно ќе го носи дресот на Пелистер, откако битолскиот клуб го обезбеди својот најголем летен потпис пред стартот на новата сезона. Искусниот офанзивец се враќа во матичната средина со цел да му помогне на тимот во остварувањето на амбициите. Во досегашната кариера Мирчевски настапуваше за Вардар, Академија Пандев, ТСЦ Бачка Топола, Железничар и Силекс, а зад себе има и настапи за македонската репрезентација.

Највпечатливиот период го имаше во дресот на Академија Пандев, кога со 16 погодоци на 18 натпревари се етаблираше како еден од најопасните напаѓачи во Првата македонска лига. Со неговото враќање, Пелистер добива проверен фудбалер со богато искуство, кој треба да биде еден од главните адути на тимот во претстојната сезона.