Мароканскиот тинејџер Ајуб Буади е една од првите големи сензации на Светското првенство. 18-годишниот играч за врска одигра неверојатен натпревар против моќниот Бразил, а неговата нереална зрелост под притисок веднаш го привлече вниманието на европските фудбалски тешкаши. Најпознатиот фудбалски инсајдер Фабрицио Романо не чекаше многу и веднаш по натпреварот лансираше трансфер ексклузива која ја запали Англија.

Според информациите на Романо, челниците на Ливерпул веќе оствариле директни контакти и одржале итни состаноци со агентите на младиот Буади. Во трката за неговиот потпис сериозно е загреан и Арсенал, кој исто така ги започнал првите преговори за да го осигура неговиот потпис пред конкуренцијата. Момчето кое моментално настапува за француски Лил покажа застрашувачка смиреност во дуелите со бразилските ѕвезди, ја сокри топката на средината од теренот и се промовираше во едно од најголемите откритија на мундијалската премиера.

Приказната на новиот хит на шампионатот е уште поинтересна ако се знае дека Буади е роден во Франција, каде што ги помина сите младински репрезентативни категории. Сепак, Дидие Дешам немаше конкретен план за него во првиот тим на „триколорите“, што Мароко перфектно го искористи за да го привлече во својот национален тим преку веќе докажаниот модел за ангажирање играчи од европската дијаспора. Французите сега веројатно жалат за ваквиот пропуст, а Лил до крајот на првенството ќе биде под огромен притисок да ја задржи својата млада ѕвезда за која веќе се распрашува самиот крем на Премиер лигата.