Манчестер Јунајтед откри нови детали за еден од најамбициозните инфраструктурни проекти во фудбалот, изградба на нов стадион со капацитет од 100.000 гледачи. Новата арена на „црвените ѓаволи“ ќе биде изградена на околу 350 метри од сегашниот „Олд Трафорд“ и ќе биде дел од голем проект за целосна трансформација на областа околу стадионот. Од клубот очекуваат новото здание да донесе значајни економски придобивки, со отворање на илјадници работни места и изградба на нови станбени и деловни објекти во регионот.

Сопственикот Сер Џим Ретклиф има големи амбиции и сака новиот дом на Јунајтед да стане еден од највпечатливите стадиони во светот. Проектот се проценува на околу две милијарди фунти, а доколку плановите се реализираат според предвиденото, стадионот би требало да биде завршен за сезоната 2030/31. Со капацитет од 100.000 места, новата арена би го надминала „Вембли“ и би станала најголемиот стадион во Велика Британија. Во меѓувреме, легендарниот „Олд Трафорд“, дом на Манчестер Јунајтед повеќе од еден век, останува симбол на клубот, но веќе не ги исполнува целосно барањата на модерниот фудбал.