Македонската кошаркарска репрезентација со победа ги продолжи подготовките за претквалификациите за Евробаскет 2029, откако во контролен натпревар во Скопје ја совлада Бугарија со 91-87. Натпреварот во салата „Лазар Лечиќ“ беше израмнет во текот на сите 40 минути, со чести промени на водството. Бугарија подобро го отвори мечот, но Македонија брзо возврати и до крајот на првото полувреме обезбеди минимална предност од 45-43.

Во третата четвртина двете репрезентации водеа голема битка, па пред последниот период резултатот беше израмнет (66-66). Во неизвесната завршница, тројката на Стојан Ѓуровски и сигурната игра на Стјуард беа пресудни за конечната победа на македонскиот национален тим. Натурализираниот Американец Стјуард беше прв стрелец на Македонија со 26 поени, Ѓуровски постигна 15, Ефремовски додаде 12, а Ташовски натпреварот го заврши со 10 поени.

Непријатна вест за македонскиот табор беше повредата на Марин Петков, кој уште во првата четвртина го напушти теренот поради повреда на скочниот зглоб.