Македонската фудбалска репрезентација полека ги комплетира подготовките за новиот циклус во Лигата на нации, каде што за првпат ќе се натпреварува во Б-дивизијата. Пред избраниците на Гоце Седлоски се сериозни предизвици и дуели со реномирани европски селекции, а веќе се познати и деталите за едно од најтешките гостувања. Фудбалската федерација на Швајцарија потврди дека натпреварот против Македонија, закажан за 6 октомври, ќе се одигра на стадионот „Свиспор Арена“ во Луцерн.

Македонија ќе го отвори настапот во новото издание на Лигата на нации на 26 септември, кога во Скопје ќе ја пречека токму Швајцарија. Покрај швајцарската селекција, во групата се и Шкотска и Словенија, што најавува исклучително тежок циклус за македонскиот национален тим. Швајцарците влегуваат како едни од фаворитите во групата, особено по успешниот настап на последното Светско првенство, но Македонија ќе има амбиција да биде конкурентна и да покаже дека заслужено се избори за место меѓу репрезентациите во Б-дивизијата на Лигата на нации.