Драмата на мундијалскиот дуел меѓу Белгија и Сенегал го достигна својот врв во последните секунди од второто продолжение. Сите очи беа вперени во Ромелу Лукаку кога беше досуден пенал за Белгијците, но во следниот кадар искусниот напаѓач се повлече. Одговорноста ја презеде капитенот Јури Тилеманс, кој прецизно погоди за победа од 3:2 и пласман во осминафиналето на Светското првенство.

По завршувањето на мечот, робусниот центарфор искрено објасни зошто решил да го препушти најважниот удар на натпреварот. Тој призна дека сакал да шутира, но психички не бил подготвен за толку тешки и пресудни моменти, па затоа сметал дека е подобро изведувањето да му го препушти на Тилеманс бидејќи тимот е секогаш над сè.

Белгискиот репрезентативец зад себе има многу тешка сезона во Наполи, каде постигна само еден гол и имаше скромна минутажа. Дополнително, минатиот септември тој доживеа и голема лична трагедија со загубата на својот татко. Сепак, и покрај лошата форма, неговите партии на овој Мундијал беа клучни за големиот пресврт.

Во свој стил, Лукаку на крајот се пошегува дека му е доста од вакви натпревари со висок интензитет. Тој упати сериозни комплименти до Сенегал, нарекувајќи ги една од најдобрите селекции на турнирот, но додаде дека Белгија на крајот покажала карактер, храброст и победнички тимски дух.