Седумкратниот шампион во Формула 1, Луис Хамилтон, ги демантираше гласините за пензионирање и потврди дека останува во Ферари до крајот на 2027 година. Иако минатата сезона ја заврши на шестото место без ниту еден подиум, искусниот Британец годинава веќе забележа одличен пласман на трката во Кина. Пред претстојното Гран-при во Канада, каде што ја оствари својата прва победа, тој нагласи дека воопшто не размислува за крај на кариерата.

„Сè уште сум мотивиран, со целото срце го сакам ова што го работам и веќе правам планови за следните пет години“, порача Хамилтон.

Возачот на Ферари изненади и со подготовката за Монтреал, одлучувајќи овој пат целосно да го прескокне тренингот на клупскиот симулатор. Наместо тоа, тој се фокусираше на анализа на податоците со инженерите за да го подобри сопирањето и механичкиот баланс на самата патека. Овој несекојдневен пристап треба да му помогне на италијанскиот тим подобро да ги разбере и оптимизира новите аеродинамички надградби од Мајами.