Пари Сен Жермен извојува уште една убедлива победа во Лигата на шампионите, декласирајќи го Слован Братислава со 6:1 на „Паркот на принцовите“. Шоуто на теренот го предводеше Феран Торес со хет-трик, два погодоци беа дело на Усман Дембеле, додека еден гол постигна Фабијан Руис. Стратегот на парижаните, Луис Енрике, ја искористи длабочината на својот состав и за овој натпревар реши да ги одмори Дезире Дуе и Хвича Кварацхелија.

По завршувањето на средбата, Енрике говореше за квалитетот на својот тим и големиот број кандидати кои парискиот гигант ги има во трката за најпрестижното индивидуално признание.

„Дезире играше многу во изминатиот период и се обидов да го одберам најдобриот состав за овој натпревар. Квара, според мене, исто така може да ја освои ‘Златната топка’. Истото важи и за Усман Дембеле, Витиња, па и за Фабијан Руис. Нашите навивачи скандираат ‘Усман, Златна топка’, но во иднина можеби ќе го слушаме тоа скандирање и за некој друг од нашите фудбалери“, истакна Луис Енрике.

Шпанскиот стручњак подвлече дека е гордост за клубот што доминира на списокот со номинирани играчи за оваа година.

„Тоа што сме тим со најмногу играчи на листата од 30 номинирани претставува огромна мотивација за нас. Токму тоа е она што го симболизира Пари Сен Жермен“, заклучи тренерот на европскиот првак.