По одличната сезона и освоената титула со Тун во швајцарскиот шампионат, македонскиот напаѓач Елмин Растодер стана мета на повеќе познати европски клубови.

Неговиот учинок од 13 погодоци во повратничката година на екипата во елитата не остана незабележан, па така француски Лион и грчки Панатинаикос веќе прават конкретни чекори за негов ангажман. Покрај овие два тима, германскиот медиум „Скај“ пренесува дека и неколку бундеслигаши активно ја следат ситуацијата и подготвуваат свои понуди за 22-годишниот голгетер.

Со оглед на тоа што актуелниот договор со швајцарскиот тим му истекува за само една година, управата на Тун се наоѓа пред сериозен крстопат дали да го продаде летово или да ризикува тој следната година да замине без отштета.

Како и да се одвиваат работите на трансфер-пазарот, јасно е дека пред нашиот репрезентативец е период во кој ќе може да избира каде ќе го направи следниот голем чекор во кариерата.