Само десет години откако го приреди едно од најголемите изненадувања во историјата на англискиот фудбал, Лестер Сити се најде во ситуација клубот да биде понуден на продажба. Сопствениците на „лисиците“, тајландската компанија Кинг Пауер, се подготвени да се разделат со клубот, но за тоа очекуваат најмалку 200 милиони фунти, објавува Би-Би-Си.

Веста доаѓа во момент кога Лестер се соочува со еден од најтешките периоди во својата понова историја. Од оваа сезона клубот ќе настапува во Лига 1, третото ниво на англискиот фудбал, откако во само две години доживеа две последователни испаѓања. Падот е особено драматичен ако се земе предвид што се случуваше пред само една деценија. Во сезоната 2015/16, Лестер, кој тогаш беше вистински фудбалски аутсајдер, ја освои титулата во Премиер лигата и го приреди едно од најголемите спортски чуда. Кинг Пауер го презеде клубот во 2010 година, кога тајландскиот бизнисмен Вичај Шривадханапрабха ги купи акциите од Милан Мандарич. Под неговото раководство започна златниот период на Лестер.

Клубот избори враќање во Премиер лигата во 2014 година, а само две сезони подоцна стигна до историската шампионска титула. Успесите продолжија и на европската сцена, па во 2017 година Лестер стигна до четвртфиналето во Лигата на шампионите. Но, една година подоцна клубот беше погоден од голема трагедија. Вичај Шривадханапрабха загина во хеликоптерска несреќа непосредно во близина на стадионот „Кинг Пауер“.

Лестер подоцна успеа да го освои и ФА Купот во 2021 година, но финансиските проблеми постепено почнаа да го земаат својот данок. Слабата финансиска состојба се одрази и врз резултатите на теренот, а клубот започна незапирлив пад низ англиската фудбалска пирамида. Најпрво следуваше испаѓање од Премиер лигата во Чемпионшип, а потоа и нов пад во Лига 1. Така, клуб кој пред само десет години беше шампион на Англија сега се наоѓа во третото ниво и истовремено е ставен на продажба.

Според информациите на Би-Би-Си, Кинг Пауер ќе разгледа понуди од најмалку 200 милиони фунти за клубот. Доколку продажбата се реализира, тоа би можело да означи крај на една ера во Лестер и почеток на ново поглавје за клубот кој за само една деценија помина пат од сензационален шампион до третолигаш.