Иако има 41 година, Леброн Џејмс е главна тема во НБА лигата. Американските медиуми пренесуваат дека тој следната недела ќе се сретне со Стеф Кари за да разговараат за евентуална нивна соработка во Голден Стејт Вориорс. Двајцата поранешни големи ривали веќе покажаа дека се моќен тандем кога минатото лето донесоа олимписко злато за САД во Париз.

Сепак, овој трансфер носи големи пречки поради ограничувањето на буџетот. Вориорс планираат да го потпишат Џејмс преку специјален исклучок вреден околу 15 милиони долари, но тоа драстично ќе ги ограничи нивните опции за купување други засилувања, кои потоа би можеле да доаѓаат само за минимални плати.

Клучот за формирање на овој супер-тим всушност лежи кај Кристапс Порзингис. Раководството на Голден Стејт се надева дека ќе го убеди Летонецот, кој заработуваше 30,7 милиони долари, да прифати значително помал договор поради честите повреди. Неговото останување е неопходно бидејќи тој носи одлична одбрана и сигурен шут, што ќе биде клучно за ширење на просторот во нападот доколку Леброн и Дрејмонд Грин се заедно на паркетот.